Kooxda Arne Slot ayaa la sheegay in dalabkii hore ee £110 milyan ay Newcastle ka diiday, balse Alexander Isak ayaa lagu amray inuu kaligiis tababarto Arbacadii, kadib markii kooxda intiisa kale ay u duuleen safar hore u sii ah oo ay ku aadayaan Singapore iyo Koonfurta Kuuriya, taasoo muujinaysa in mustaqbalkiisa uu weli madmadow ku jiro.
Xilli ciyaareedkii hore, kaliya Mo Salah oo u ciyaara Liverpool ayaa ka goolal badan Isak, iyadoo Salah uu dhaliyay 29 gool halka Isak uu dhaliyay 23. Weeraryahanka xulka Sweden wuxuu ahaa awooda ugu weyn ee Newcastle ku hogaamisay booska shanaad iyo helitaanka ciyaaraha Yurub ee xilli ciyaareedka soo socda.
Isak wuxuu ka yimid kooxda Real Sociedad xagaagii 2022 wuxuuna door weyn ka qaatay guulaha kooxda xilli ciyaareedkii hore, isagoo Newcastle u horseeday inay ku guuleystaan koobkoodii ugu horreeyay ee maxalli ah muddo 70 sano ah – Carabao Cup – sidoo kalena ay u soo baxaan Champions League markii labaad saddex xilli ciyaareed gudahood.
Isak ayaa dhaliyay gool ciyaartii kama dambaysta ahayd ee Carabao Cup ee ay Newcastle 2-1 kaga adkaatay Liverpool, iyadoo Dan Burn uu isaguna gool dhaliyay.
Weeraryahanka ayaa kooxda u sheegay inuu doonayo inuu furo bog cusub oo mustaqbalkiisa ah xagaagan, isagoo Spain ugu duulay inuu tababar ku qaato kooxdiisii hore ee Sociedad ka hor inta uusan dib ugu soo laaban Tyneside, wax yar kahor intii aysan Eddie Howe iyo kooxdiisu kasoo degin Seoul, kadibna la siiyay laba maalmood fasax ah.
Tababaraha Newcastle, Eddie Howe ayaa yiri:
“Waa inaad kasbataa xaqa aad ugu tababaranayso kooxda. Waxaan nahay Newcastle United. Ciyaaryahanku wuxuu leeyahay masuuliyad uu uga mid noqonayo koox, waa inuu si habboon u dhaqmaa."
"Sidaas darteed, arrintaas ayaa hadda saameynaysa. Waxaan hubin doonaa in ciyaaryahan kasta uu kasbado xaqa uu ugu tababaranayo kooxda inteeda kale. Ma jiro ciyaaryahan si liidata u dhaqma oo haddana si caadi ah ula tababaran kara kooxda.”
Dhanka kale, Darwin Nunez ayaa u muuqda inuu ka tegayo Liverpool kadib saddex sano oo uu kooxda la joogay, isagoo kusii jeeda horyaalka Saudi Arabia, gaar ahaan kooxda Al-Hilal. Nunez oo 26 jir ah, ayaa kooxda ugu soo biiray £85 milyan, waxaana uu xilli ciyaareedkii hore kaliya ku soo bilowday 8 kulan oo Premier League ah inkastoo kooxda ay horyaalka qaaday.
Weeraryahanka Uruguay ayaa dhaliyay 40 gool 143 kulan oo uu u saftay kooxda, balse wuxuu hoos uga dhacay xulashada weerarka kooxda labadii tababare ee Klopp iyo Arne Slot.
Liverpool waxay bishii Janaayo iska diiday dalab ku kacaya £60 milyan oo kaga yimid kooxda Al-Nassr, si uu diiradda u saaro tartanka horyaalka. Haddii aan la iibin, Nunez wuxuu weli qeyb ka noqon doonaa qorshaha Community Shield ee Liverpool ay la ciyaarayso Crystal Palace Axadda.
Kooxda Newcastle ayaa isha ku heysa beddelka Isak haddii uu baxo, iyadoo la xiriirinayo weeraryahanka Brentford Yoane Wissa. Ciyaaryahanka 28-jirka ah ayaa noqon doona khasaare weyn oo ku dhacaya tababaraha cusub ee Brentford, Kieth Andrews.
Wissa ayaa seegay guushii 1-0 ahayd ee ay Brentford ka gaartay QPR, iyadoo goolkaas uu dhaliyay kabtanka cusub ee kooxda Nathan Collins. Lama oga in Wissa uu qeyb ka noqon doono kulanka saaxiibtinimo ee ay Brentford la ciyaarayso Borussia Monchengladbach Jimcaha.