Liverpool ayaa si qurux badan ugu dabbaal-degtay hanashada horyaalka Premier League kaddib markii ay kasoo kaceen gool looga hormaray ayna 5-1 ku xasuuqeen Tottenham garoonkooda Anfield.
Goolal ay qeybtii hore kala dhaliyeen Luis Diaz, Alexis Mac Allister iyo Cody Gakpo ayaa ku dhowaad xaqiijiyay horyaalkoodii 20-aad ee heerka ugu sarreeya, taasoo la mid ah rikoorka ugu badan, ka hor intii uusan Mohamed Salah dhalin goolkiisii 28-aad ee xilli-ciyaareedka iyo gool uu iska dhaliyay Destiny Udogie oo natiijada ka dhigay mid aad u wayn.
Tottenham ayaa si kooban uga hanjabay inay xafladda burburiyaan markii horey goolka u dhaliyay Dominic Solanke, oo hore uga tirsanaa Liverpool, balse kooxda reer London ma aysan muujin wax iska caabin ah markii kooxda Reds ay bilowday inay si buuxda u ciyaarto.
Koobkan, oo ay Liverpool ku xaqiijisay afar kulan kahor dhamaadka xilli-ciyaareedka, ayaa ah kaliya kii labaad ee ay kooxda reer Merseyside ku guuleysato 35 sano gudahood. Waxa kale oo ay tahay markii ugu horreysay muddadaas oo ay taageerayaashu si toos ah ula dabaal-degaan horyaalka, maadaama markii ugu dambeysay ee ay ku guuleysteen 2020-kii ay ahayd xilli uu jiray xayiraaddii Covid-19.
Kooxda uu hogaamiyo Arne Slot ayaa kulanka soo gashay iyagoo 12 dhibcood ka sarreeya Arsenal oo kaalinta labaad fadhisa, waxaana ay u baahnaayeen oo kaliya barbaro si ay si rasmi ah koobka ugu xaqiijiyaan – arrin muddo usoo muuqaneysay inay dhici doonto.
Guushan ayaa dhamaystir u noqotay xilli ciyaareed xasuus mudan oo uu Slot sameeyay isagoo ah tababarihiisa ugu horreeya Liverpool, kaddib markii uu beddelay tababarihii guulaha badan lahaa ee Jurgen Klopp xagaagii hore.
Slot wuxuu noqday tababarihii ugu horreeyay ee Dutch ah ee ku guuleysta Premier League, wuxuuna sidoo kale noqday tababarihii shanaad ee ku guuleysta horyaalka xilli-ciyaareedkiisii ugu horreeyay, kaddib Jose Mourinho, Carlo Ancelotti, Manuel Pellegrini iyo Antonio Conte.
0 Comments